GIKONDO: ISOZWA RY’ICYUMWERU CY’UBUREZI GATOLIKA. ICYEREKEZO GISHYA: UMWANA USHOBOYE KANDI USHOBOTSE.

Paroisse Gikondo

Sangiza inkuru

Kwizihiza icyumweru cy’uburezi gatolika  muri paruwasi ya Gikondo yitiriwe Mutagatifu Visenti Pallotti bisize abafatanyabikorwa n’abagenerwa bikorwa mu by’uburezi biyemeje gukomeza gukorera hamwe kugira ngo abana bazavemo abantu bashoboye kandi bashobotse, bazagira icyo bamarira igihugu cyabo,  imiryango yabo na kiliziya  yabo.

Gahunda zose z’uwo munsi zabimburiwe n’Igitambo cya Misa cyatumwe na P. Dominiko Ngendahayo Tumaini, Padiri vicaire ushinzwe amashuri muri Paruwasi ya Gikondo ( photo Silas Nsanzabaganwa)
Ku wa gatanu tariki ya 26 /05/2023 paruwasi ya Gikondo yasoje gahunda imaze kumenyerwa hirya no hino mu gihugu yitwa “icyumweru cy’uburezi gatolika” ,Imihango y’uyo munsi yabimburiwe n’igitambo cya misa cyaturiwe muri kiliziya ya paruwasi yitiriwe Mutagatifu Visenti Pallotti-Gikondo.
Mu kinyarwanda dusanzwe tuzi ko “Uburere buruta ubuvuke”. Inama y’Abepisikopi Gatolika bo mu Rwanda yo mu gihembwe cya mbere cya 2022, yagarutse ku burere buhabwa abana mu mashuri, maze ibitangaho icyerekezo muri gahunda z’ikenurabushyo, mu mwaka wa 2022-2023. Muri iryo tangazo , Abepisikopi baragira bati:
”Uburere buhera mu rugo bukunganirwa n’umuryango mugari, bugashimangirwa n’abarezi b’ingeri zose kugeza umwana akuze akabasha nawe kuba yarera abandi. Ubufatanye ni ngombwa rero kugira ngo umwana adahagama hagati y’ibyiciro bitandukanye by’abamwitaho.
Uburezi bufite ireme bushingira ku burere, bugasigasirwa n’integanyanyigisho zishyitse zigendana n’imyigishirize ihamye irangwa n’ubushobozi mu bumenyi n’ubwitange nk’ubw’Imana mu bushake bwo gufasha abana. “(Reba: Itangazo risoza inama y’Inama y’Abepisikopi Gatolika mu Rwanda y’igihembwe cya mbere cy’umwaka wa 2022.)
 
Bwana Nyamucahakomeye Jean de Dieu ni Umuyobozi wikigo cy’Amashuri cya APAPED/Murambi akaba n’umuyobozi wa Komisiyo y’uburezi muri paruwasi ya Gikondo, aha arashimira umwana witsinze neza ( photo Silas Nsanzabaganwa)
Mu kiganiro umuyobozi wa Komisiyo y’uburezi muri Paruwasi ya Gikondo Bwana Nyamucahakomeye Jean de Dieu yagiranye uwo munsi na Komisiyo y’itangazamakuru muri paruwasi ya Gikondo ; yasobanuye imvano y’icyumweru cy’uburezi gatolika avuga no ku nsanganyamatsiko y’uyu mwaka ndetse no ku bufatanye hagati ya Kiliziya na Leta.
 
Ku bijyanye n’icyumweru cy’uburezi gatolika ubwacyo yagize ati: “Ubundi si icyumweru ni ukwezi, ariko mu cyumweru cya nyuma hakabaho imihango yo kwitegura gusoza iyo gahunda yose.”
Ku bijyanye n’insanganyamatsiko n’ubufatanye hagati ya kiliziya na leta, yagize ati: “Nk’uko mu bizi, Kiliziya gatolika n’umufatanyabikorwa na Leta, byagera ku burezi bikaba agahebuzo. Urebye nk’ubu insanganyamatsiko twari dufite muri uku kwezi, iragira iti:”Turere umwana ushoboye kandi ushobotse”. Ibyo rero Leta ntabwo yabyifashamo, ni ngombwa ko na Kiliziya ibigiramo uruhare, maze yabinyuza mu mashuri bikaba ari nko kwibutsa abarezi ko abana badahabwa ubumenyi gusa, ahubwo ko n’uburere ari ngombwa.
 
Yakomeje agira ati:” Aho ibintu bigeze rero , byagaragaye ko abantu bihutira gusahaka ubumenyi kurusha ubwo bushobozi twavugaga. Ugasanga umuntu yarize, afite iyo PHD, afite izo za MASTERS, ariko mu buzima busanzwe ugasanga ntacyo amariye umuryango, ntacyo amariye igihugu na sosiyeti abamo. Uwo muntu umeze utyo na kiliziya ntacyo yayimarira. Byabaye ngombwa rero ko bantu batekerereza hamwe, bareba uko byombi byajyana, ufite ubumenyi akaba anashobotse, uwo nguwo niwe igihugu gikeneye, niwe uzagiteza imbere.”
Mufite inshingano zitoroshye zo gufasha abana kubonera icyarimwe uburere n’uburezi, bakaba abana bashoboye kandi bashobotse. Umuyobozi wa APAPED/Murambi akaba n’umuyobozi wa Komisiyo y’uburezi ari kumwe n’umuyobozi wa GSC St Vincent Pallotti. ( photo Silas Nsanzabaganwa)
Umuyobozi w’Uryunge rw’Amashuri Mutagatifu Visenti Pallotti , Mama Marie Therese Musengimana, nawe yavuze kuri iyi nsanganyamatsiko .”Turere umwana ushoboye kandi ushobotse”, ati : Iyi ni insanganyamatsiko ya kiliziya gatolika y’uyu mwaka, ijyanye n’uburezi. Ivuga ko tugomba kurera, umwana ushoboye kandi ushobotse. Ni ukuvuga ko uburere dutanga muri kiliziya, uyu mwaka hifujwe ko twaharanira guha umwana ubumenyi butuma ashobora kugira icyo yigezaho cyazamugirira akamaro ejo hazaza. Nyamara ibyo ntibyakunda atari umwana ushobotse kuko mbere na mbere agomba kuba ari umwana ushobotse kandi ushobokera abamurera, kugira ngo nawe abashe kwakira ubwo burere bwiza bamuha, hanyuma nawe akazabasha gushobora, kuko nyine yashobotse agashobokera abamurera.”
Abarezi basabwe gushyira umutima ku kazi bakora ( photo Silas Nsanzabaganwa)
Ibi rero birasaba gukorera hamwe, ubwo burere abarezi bashishikarizwa guha umwana, bugakomereza no mu rugo no mumiryango yabo, ku buryo habaho kuzuzanya. Kuko iyo umwana ahabwa uburere bwiza mu rugo, bizorohera n’abarezi gukomerezaho no kubon aumwanya wo kumuha ubundi bumenyi. Ibyo nabyo umuyobozi w’ishuri yabikomojeho avuga ahantu bashyira imbaraga iyo bacyakira abana bavuye mu miryango yabo. yagize ati: “Iyo bageze ku ishuri mbere y’amasomo, bitewe n’uko abana baba bavuye mu miryango baje mu wundi, kuko ishuri riba rihindutse umuryango mugari cyane, mbere na mbere ikintu baba bagomba kwiga, ni ikinyabupfura, kugira ngo babashe kumenya kubana hagati yabo, bakubahana, gukundana, no kubakubaha ababarera, kuko iyo umunyeshuri atubaha, cyangwa iyo abuze izo ngdangagaciro zindi, bigorana kugira ikindi kintu afata, kuko n’iyo wamuha ubumenyi, ntacyo byamumarira”.
Abana batozwa byinshi birimo kubana n’abandi, kubaha no gusangira ( photo Silas Nsanzabaganwa)
Umunyeshuri uhagarariye abakobwa asanga ibibazo biri mu ngo biri mu mu nzitizi zibuza abana kuba abana bashoboye kandi bashobotse ( photo Silas Nsanzabaganwa)
Ubwo burere umwana avana mu rugo bwanagarutsweho n’umunyeshuri uhagarariye abandi, icyiciro cy’abakobwa, Madamazela Ingabire Ketia, ubwo yaganiraga na komisiyo y’itangazamakuru, akayitangariza imbogamizi zikunze kuboneka, zinabuza akenshi abanyeshuri kuba ba bana bashobotse. Yagize ati:” Mbere na mbere ikintu navuga kuyobora abanyeshuri biravuna. Ariko iyo ubashije kuba wakiyunga nabo, ukisanisha nabo, mubasha kuba mwajya mu murongo umwe. Ariko bitewe n’uko abanyeshuri duturuka mu miryango itandukanye, ntabwo uba uzi uko yaraye cyangwa uko iwabo byagenze. Hari igihe rero usanga yaje atari muri mood [mudu] nziza, wamubwira itegeko rigenga ikigo akagusuzugura. Icyo gihe rero tuba tugomba kumwegera , no kumuganiriza kugira ngo twumve icyaba cyabiteye.”

Umubyeyi yasabye bagenzi kwita ku nshingano zabo za kibyeyi no kudatererana abarezi mu burere baba abana babo. ( photo Silas Nsanzabaganwa)Aho niho uhagarariye ababyeyi mu ijambo rye , yahareye ashishikariza ababyeyi begenzi be kwita ku burere no ku burezi bw’abana babo, kudatererana abarezi kuko batabasimbura mu nshingano za kibyeyi ahubwo ko buzuzanya, ahubwo ko buzuzanya, bagutahiriza umugozi umwe mu burere bw’abana babo. Yanaboneyeho gusaba abana kwemera gushobokera ababezi biriranwa nabo ku ishuri, kwita ku masomo bahabwa no kwirinda kurarurwa no kurangazwa n’ibiri hanze aha.

Abafatanyabikorwa mu by’uburezi ni benshi, bashyize hamwe uko bikwiye, abana bajya bavamo abantu bashoboye kandi bashobotse,bafitiye akamaro igihugu cyabo, imiryango yabo na kiliziya yabo. ( photo Silas Nsanzabaganwa)

Abafatanyabikorwa mu by’uburezi rero bakwiye gukomeza guhuriza hamwe imbaraga , kugira ngo ingamba , n’ibikorwa byiza byagezweho muri kuriya kwezi Kiliziya gatolika yahariye uburezi bitavaho bigwa ingese cyangwa bivukemo icyuho. Abashyize hamwe Imana irabasanga. /Habumukiza Joseph