I Gikondo imbaga y’abakristu yishimiye kongera gutambagiza Isakramentu Ritagatifu

Paroisse Gikondo

Sangiza inkuru

Buri mwaka Kiliziya Gatolika yizihiza Umunsi Mukuru w’Isakaramentu, abakristu bakishimira kuritambagiza mu duce tunyuranye paruwasi yabo iherereyemo. Mu mwaka wa 2020 n’uwa 2021, ntibyakunze kubera ingamba zo kwirinda  icyorezo cya Covid 19. Uyu mwaka, nyuma y’imyaka 2, abakristu hirya no hino mu maparuwasi yabo, babonye ayo mahirwe. Muri Paruwasi ya Gikondo  Paruwasi naho ibyishimo byari byose.  Binyuranye n’ibyumweru bisanzwe, kuri iki cyumweru hari habaye misa ebyiri gusa mu gihe ubundi hano kuri paruwasi habaga misa 5.

 

Mbere yo gutangira umutambagiro, abana batera indabyo n’abavuzi b’ingoma bagiye mu myanya yabo

 

Ibyo bikaba byari mu buryo bwo gufasha abakristu bose babishoboye kwitegura no kwitabira uwo mutambagiro mutagatifu dore ko bose bari banyotewe no kongera kuwukora. Abana n’abakuru sibo babonye misa ya kabiri ihumuza. Ishyushyu ryo kongera kuzenguruke uduce twa Kanserege na Maremebo by’Umurenge wa Gikondo ryari ryinshi,  dore ko bahaherukaga mu mwaka wa 2019. Ku bana bari baraye bahawe ukarisitiya ya mbere ho byari ibindi bindi.

 

Abakorerabushake bari bitabiriye gucunga umutekano wo mu muhanda , kandi bakabyubahirwa.
Umutambagiro wakozwe mu ituze, abakorerabushake bafasha abawurimo kubahiriza uburenganzira bw’abandi bari mu muhanda

 

Guhera ahagana saa  nibwo Igitambo cya Misa cyari gihumuje, maze umutambagiro utangira ubwo. Wari umutambagiro ubereye ijisho, wiganjemo ibara ry’umweru n’umutuku. wari umutambagiro urangwa n’ituze riranga abari mu isengesho, byatumaga n’abandi batawurimo bawubaha , ku buryo baba abagenzi bari ku maguru, cyangwa abari mu modoka zabo no kubindi binyabiziga bahagararaga bikareka abari mu muri uwo mutambagiro bagahita.  Uko abakristu bavaga ku ntera bajya kuyindi , niko umubare w’abari mu mutambagiro wagenda urushaho kwiyongera kuko uretse abari batangiranye nawo ku kiliziya, hari bandi bagendaga biyongeramo bavuye mu ngo zabo aho umutambagiro wanyuraga, hari nabasohokaga mu bipangu byabo bakuruwe n’umurishyo w’ingoma cyangwa indirimbo n’imbyino bikarangira bakomeje kujyana n’abandi. 

Bakuruwe n’umurishyo w’ingoma n’amajwi y’indirimbo n’imbyino basohoka mu bipangu byabo
Uyu mubyeyi yavuye mu byo yari yibereyemo, abisigaho, asanganira isakramentu; aho ryanyuze hose yarigendaga imbere abyina!

Nyuma w’uwo mutambagiro, utagira uko usa , twasigarana iki ? Inyigisho Padiri Dominiko Tumaini Ngendahayo yatanze uwo munsi yadufasha kubona ingingo 10 buri mukristu yasigarana ku  Mukuru w’isakramentu.  Buri gihe rero twizihiza umunsi Mukuru w’Isakramentu, tujye twibuka ko :

  1. Yezu Kristu yagiranye natwe igihango gikomeye.
  2. Yezu Kristu ari impamba  y’ubuzima  mu rugendo turimo hano ku isi.
  3. Yezu yaduhaye umubiri we  nk’Ingwate y’ubuzima bwacu.
  4. Yezu Kristu  yatwihayeho ifunguro rihoraho rya roho n’umubiri byacu.
  5. Yezu Kristu yatwihayeho igitambo nyabuzima.
  6.  Ubumwe bwacu nk’abakristu bushingiye ku gitambo cy’ukarisitiya.
  7. Abakristu twese turi mu rugendo kandi ko nta muntu ushobora kudufasha kurusoza uretse Yezu Kristu ubwe.
  8. Guhimbaza Isakramentu Ritagatifu ari uguhimbaza umushyikirano w’Imana n’abantu.
  9. Gushengerera Isakramentu ritagatifu ari uburyo buduhuza n’Ijuru.
  10. Ukarisitiya ari ishingiro n’isoko ry’ubumwe by’abakristu.

 

Andi mafoto agaragaza uko byari byifashe uwo munsi

Habumukiza Joseph

Komisiyo y’Itangazamakuru