PARUWASI YA GIKONDO IKOMEJE URUGENDO RW’UBWIYUNGE

Paroisse Gikondo

Sangiza inkuru

Ku wa gatandatu tariki ya 03/03/2018, Paruwasi ya Gikondo yakomeje urugendo rw’umwaka udasanzwe w’ubwiyunge. Uru rugendo yarutangije ku wa kane tariki ya 22/02/2018, igihe yahuzaga Abihayimana bakorera muri Paruwasi ya Gikondo. Kuri uyu wa gatandatu, yari Paruwasi ikaba yari igeze ku ntera yayo ya kabiri y’urwo rugendo rw’ubwiyunge.

Mu isengesho rya “Dawe uri mu Ijuru ” , hari aho tugera tukavuga ngo ” … Utubabarire ibyaha byacu, nk’uko natwe tubabarira abaducumuyeho.”  Mu rugendo rw’ubwiyunge turimo, buri wese arasabwa gutera agatambwe agana mugenzi we.

Biro y’Inama ya Paruwasi ikaba yari yatumiye abasanzwe baza mu nama ya Paruwasi y’Ikenurabushyo, mu nama yaguye y’Ikenurabushyo. Ku rwego rwa santarari, hari hatumiwe abantu 7 bagize komite ya buri santarari, naho ku rwego rw’impuzamiryangoremezo, hatumirwa biro igizwe n’abantu 3. Iyo nama  y’Ikenurabushyo yaguye ikaba yaragombaga kwitabirwa n’abakristu 104; ariko kubera impamvu zinyuranye, yitabiriwe n’abantu 80.

Padiri Mukuru wa paruwasi Gikondo, Rwasa Chrysante (uwo uhagaze), atangiza imirimo y’Inama ya Paruwasi y’Ikenurabushyo ku wa gatandatu tariki ya 03/03/2018

Nk’uko bisanzwe, inama yabanje kwemeza raporo y’inama iheruka. Nyuma abitabiriye inama bahabwa ikiganiro  ku mateka y’Igihugu cyacu, baganira ku bwiyunge no ku ntera za ngombwa  zifasha kubaka ubwiyunge nyabwo.

Abitabiriye inama bagize umwanya wo kungurana ibitekerezo,ku kiganiro bari bamaze gukurikirana batanga ubuhamya ku byo bazi .

Ubuhamya bwakurikiwe n’ibibazo buri wese  yari yasubije ku giti cye  kandi mu nyandiko , ibisubizo byatanzwe bihurizwa hamwe kandi bitangarizwa abri aho.  Ibyo bibazo buri wese yasubije ku giti cye byakurikiwe n ‘ibindi bibazo byasubirijwe mu matsinda umunani bahise bakora. Na none ibyavuye mu matsinda yose bitangarizwa abari mu nama. N’ubwo buri wese yari yahawe umwanya wo gusubiza ku giti cye no gutanga ibitekerezo bye binyuze mu matsinda, habaye n’umwanya wo kungurana ibitekerezo. Icyone abari mu nama bagarutseho cyane kandi bakagihurizaho ndetse  kigafatwa nk’umwe mu myanzuro y’iyo nama, ni uko paruwasi igomba gutegura mu gihe cya vuba  ibindi biganiro; kuko byagaragaye ko abantu benshi bakeneye umwanya uhagije wo kwifungura, bakavuga.

Abari bateraniye mu nama batekereza ku byakorwa kugira ngo ubwiyunge bugerweho

Kuri uwo mwanzuro, abari mu nama bashyigikiye   icyifuzo cya Biro y’Inama ya Paruwasi cyo gutegura ibiganiro bishingiye ku matsinda  ashingiye ku myaka: igatumirwamo  hakurikje ikigero cy’imyaka barimo, guhera ku bantu bageze mu zabukuru kugera ku rubyiruko ruri mu mashuri. Izi ntera zizafasha  buri  mukristu wese kwibona mu cyiciro  cye, gutanga umusanzu we w’ibitekerezo  bye n’ubuhamya bwe yisanzuye.

Twibutse ko iyi gahunda igamije gufasha buri mukristu  kwiyunga n’Imana, kwiyunga nawe ubwe, kwiyunga na mugenzi we no kwiyunga n’ibidukijije,  nk’uko tubisanga mu butumwa  Abepisikopi Gatolika bo mu Rwanda, bandikiye abakristu  mu ntangiriro y’uyu  mwaka , bukaba bwarasomewe abakristu mu ma Paruwasi yose guhera ku itariki ya  04  Gashyantare 2018.

Padiri Mukuru yumva ubuhamwa bw’umwe mu bakristu bari bitabiriye inama
Abitabiriye inama basubiza ibibazo mu matsinda

 

Abari mu nama baganira mu matsinda
Abari mu nama babanje guhabwa ikiganiro ku mateka y’igihugu cyacu

 

Nk’uko kandi byagaragajwe  mu bitekerezo  no mu buhamaya byatanzwe n’abari muri iyo nama, ubwiyunge n’ubwo ari inzira ndende kandi ikomeye, ariko burashoboka.  Birasaba gusa ubushake, urukundo n’umwanya uhagije,  nka cya “Gisabo cy’Imana gicundwa n’abarambije abarambiwe batashye”.

Biteganyijwe ko nyuma y’iyi ntera ya kabiri, paruwasi izakurikizaho  ibiganiro  bikorewe mu matsinda y’abakristu,  hakurikijwe ikigero cy’imyaka yabo kugira ngo buri wese azatange umusanzu we mu kubaka ubwiyunge mu bana b’u Rwanda.

Joseph HABUMUKIZA.