Paruwasi ya Gikondo yimuriye muri salle yayo ibikorwa byose byaberaga mu kiliziya

Paroisse Gikondo

Sangiza inkuru

Guhera ku wa kane tariki ya 03/05/2018, Paruwasi ya Gikondo yimuriye ibikorwa byose byageraga  mu kiliziya, muri Salle yayo  kubera imirimo yo kwagura Kiliziya yatangiye. Nk’uko bigaragarira  buri muntu ugeze  kuri paruwasi muri iki gihe,  imirimo yo kwagura kiliziya yaratangiye, ku buryo  ubu ahari kiliziya hahindutse “chantier”.

Aha kuri Altari nshya. Ku muntu utari usanzwe uhazi ntiyamenya ko ari ha handi kuri podium
Ibyangombwa byose bya liturujiya byashyizwe mu mwanya ukwiye. Aha ni ahagenewe gusomerwa Ijambo ry’Imana

Kwimuka nyirizina byatangiranye no kwimura Ibiro bya Padiri Mukuru na serivisi z’ubukarani. Ibyo bikaba byarakurikiwe no kwimurira ibikorwa byose birebana na liturujiya muri salle ya paruwasi yari isanzwe ari salle mberabyombi. Igitambo cya mbere cya misa cya Misa kikaba cyarabereye muri iyi salle kuwa kane tariki ya 03/05/2018, nimugoroba.

Ikibazo  gikomeye cyane ubu gihari nyuma y’uko kwimuka,  ni ikirebana n’imyanya idahagije muri iyi salle. Ibi bikaba byaragaragaye bwa mbere ejo ku cyumweru , cyane cyane mu misa  3 zo mu rurimi rw’ikinyarwanda: Ni ukuvuga misa ya mbere itangira saa kumi n’ebriri za mu gitondo (06:00),  misa ya saa 10:00 isanzwe yitwa “Misa y’abana” na misa ya saa sita. Muri izo misa zose, abakristu buruzuye, ndetse bamwe bayumvira hanze, ariko bigeze kuri misa y’abana ho biba akarusho, kuko bari bageze n’imbere y’ibyumba by’amashuri.

Imbere mu “kiliziya ” y’ahahoze hitwa salle , abakristu barakubise baruzura
Inyuma hanze, abakristu bakurikiye misa batuje, kuko hari indangururamajwi zabafashaga gukurikira igitambo cya misa neza
Aba bose bari aha, si ugukererwa ahubwo ni uko batashoboraga kubona imyanya imbere muri salle
Mu mpande zose za kiliziya hanze hari bakristu, n’ubwo kandi bari benshi turabashimira ko bagaragazaga ubwitonzi nk’abari mu ngoro y’Imana.
No muri corrirdor yo mu muryango bari bahicaye . Aha umwe mu bari bashinzwe umutekano aratera intebe abakristu bagomba kwicaraho

Iki kibazo cyahise kigaragaza ko  tugomba gukora ibishoboka byose kugira ngo tugaruke vuba  muri Kiliziya yacu , ariko ikizwi ni uko ubu tuzayisubiramo imaze kwagurwa.  Biradusaba rero gukomeza guhuriza hamwe imbaraga zacu ariko noneho ku buryo burushijeho.

Ntakindi kizatuma kiliziya yacu yuzura vuba uretse ishyaka n’urukundo tuyifitiye
Aha hasi hagaragara nk’ahari amazi ni ha handi hahoze ikigega kinini . Abenshi mwahaguriraga cyangwa mwigeze kuhagurira amashapule n’udutabo twabaga tuhatanditse. Icyo kigega cy’amazi cyirabura cyo giteretse ahasanzwe umuryango. Aho hose hazaba ari imbere mu kiliziya ivuguruye. Ariko bizashoboka ari uko wowe nanjye tubigizemo uruhare.

Twibuke igihe cyose tuzamara muri iyi salle,ariho twumvira misa, kizaba ariyo “THERMOMETRE” yizewe kandi itabeshya y’urukundo n’ishyaka dufitiye paruwasi yacu.

Thermometre izagaragaza ishyaka n’urukundo dufitiye paruwasi yacu ni igihe tuzamara twumvira misa muri iyi salle

HABUMUKIZA Joseph/Commission y’itangazamakuru